Cyfle i ddweud eich dweud ar gerflun ym Mangor ac i gwrdd gyda'r artist

Mae Storiel yn ymgynghori gyda'r cyhoedd ar ddyluniad cerflun efydd i’w osod ger adeilad yr amgueddfa ac oriel ym Mangor. 

Mae’r artist lleol Llyr Erddyn Davies wedi’i gomisiynu i ddylunio a chreu’r cerflun, gyda’r nod o dynnu sylw at y casgliad gwych o wrthrychau ac arteffactau sydd yn cael eu harddangos yn Storiel ac sydd yn adlewyrchu hanes cyfoethog y sir.

Roedd y briff gwreiddiol yn gofyn am rywbeth chwareus, felly mae Llyr wedi cyfeirio at lawer o’r hanes lleol trwy gyfres o hetiau a phenwisgoedd i gynrychioli cymunedau a straeon niferus Gwynedd, sydd yn cynnwys cap morwr, helmed filwrol, cap graddio a meitr Esgob.

Mae'r dyluniad wedi'i ddatblygu o weithdai cyhoeddus gyda thrigolion Bangor a'r cyffiniau. Bydd yna cyfle i gwrdd gyda Llyr i siarad am y cerflun ar 6 Ebrill yn Storiel, Bangor rhwng 11am – 1pm.

Dywedodd Nia Jeffreys, Aelod Cabinet Economi a Chymuned Cyngor Gwynedd:

“Mae Storiel wedi derbyn cyllid gan gronfa Trawsnewid Trefi Llywodraeth Cymru er mwyn gallu ail-ddylunio eu gofod awyr agored ac i’w wneud yn fwy deniadol i ymwelwyr.

“Mae'r cerflun yn darlunio ffigwr ar ganol cam, ei gorff wedi'i lyncu mewn glôb haenog mawr yn cynnwys gwrthrychau o gasgliad Storiel. Mae’r arteffactau hyn yn portreadu cyfoeth ac amrywiaeth y casgliad a hanes Gwynedd.

“Rydym nawr yn awyddus i dderbyn adborth ar y dyluniad gan aelodau o’r cyhoedd ac mae holiadur ar-lein ar gael i wneud hynny: https://rb.gy/tc7b”

Mae fideo byr o'r gwaith i'w weld yma: Storiel fdeo FINAL - YouTube