Cyngor Gwynedd yn lansio Academi Gofal

Mae cynllun arloesol gan Gyngor Gwynedd wedi ei lansio dydd Mercher, 13 Tachwedd, 2024.  Bydd Academi Gofal Gwynedd yn mynd i’r afael â phrinder staff yn y sector Gofal drwy uwchsgilio a datblygu unigolion i ddilyn gyrfa yn y maes gofal.

Bydd yr Academi Gofal yn ymateb tymor byr i’r broblem staffio, ac yn ddatrysiad tymor hir i’r broblem ehangach drwy alluogi staff i ddatblygu eu sgiliau yn ogystal â cynnig cyfleoedd i bobl 17+ oed sydd â diddordeb mewn rôl Rheoli Gofal, dod yn Weithiwr Cymdeithasol neu'n Therapydd Galwedigaethol o fewn y Cyngor.

Mae’r Academi Gofal yn rhoi cyfle i unigolion dderbyn profiadau ymarferol, cyfleoedd i ddatblygu gyrfa ac i gael eu mentora gan arbenigwyr yn y maes. Bydd ymgeiswyr llwyddiannus yn yr Academi yn derbyn cyflog tra’n gweithio tuag at gymwysterau cydnabyddedig.

Dywedodd Dilwyn Morgan, Aelod Cabinet Oedolion, Iechyd a Llesiant “Mae Academi Gofal Gwynedd yn gyfle gwych i chi ddatblygu eich gyrfa yn y maes Gofal drwy weithio gyda phobl brofiadol, derbyn cymwysterau a chael cyflog yr un pryd.

“Fel ym mhob sector a sefydliad rydym yn wynebu heriau wrth recriwtio gweithwyr gofal, ar draws meysydd gofal cymdeithasol oedolion, plant ac anabledd dysgu.

“Mae ein staff gofal presennol yn ymrwymedig a phroffesiynol, ac rydym yn hynod ddiolchgar iddynt am eu gwaith yn enwedig drwy gyfnod y pandemig. Mae staff heddiw yn wynebu cynnydd yn y galw am wasanaethau oherwydd cyfuniad o ffactorau.

“Ein nod gyda’n cynlluniau recriwtio yw parhau i ddarparu gwasanaeth i’n trigolion bregus a’u teuluoedd drwy gyfrwng y Gymraeg ac ar yr un pryd buddsoddi yn ein gweithlu lleol.

“Os ydych chi erioed wedi meddwl y byddech chi’n hoffi gwneud gwahaniaeth wrth gefnogi pobl yn eu cymunedau, yna mae’r Academi Gofal yn berffaith i chi.”

Fel dilyniant i ddigwyddiad lansio’r Academi bydd cyfres o saith sesiwn galw heibio cyhoeddus yn cael eu cynnal mewn lleoliadau ar draws Wynedd er mwyn rhannu gwybodaeth gydag unigolion sydd â diddordeb ymuno â’r cynllun neu ddod i weithio yn y sector gofal yng Ngwynedd.

Ychwanegodd Gwenno Williams, swyddog yng ngwasanaethau cymdeithasol Cyngor Gwynedd: “Mae llawer o fuddiannau i’w cael wrth i chi ymuno â’r Academi, megis ennill cyflog wrth ddysgu, derbyn cefnogaeth a chymorth profiadol, cwblhau cymwysterau o werth, datblygu llwybrau gyrfa clir a gweithio mewn awyrgylch Gymreig.

“Rydym yn croesawu ceisiadau gan unrhyw un sy'n llawn cymhelliant, sydd ag agwedd garedig a gofalgar ac sydd am wneud gwahaniaeth i fywydau pobl eraill.

“Byddwn yn annog aelodau o’r cyhoedd sydd â diddordeb mewn gwaith yn y maes gofal - iddynt eu hunain neu efallai ar gyfer eu plant sydd ar fin gorffen yn yr ysgol neu’r coleg - i fynychu un o’n sesiynau galw heibio am sgwrs anffurfiol. Cadwch lygaid am fanylion y dyddiadau a’r lleoliadau ar gyfrifon cyfryngau cymdeithasol y Cyngor.” 

Am ragor o wybodaeth ac i gofrestru eich diddordeb yn yr Academi Gofal ewch i wefan Cyngor Gwynedd www.gwynedd.llyw.cymru/AcademiGofalGwynedd

Cadwch lygaid ar gyfryngau cymdeithasol Academi Gofal Gwynedd am unrhyw ddiweddariadau. Mae modd dilyn yr Academi ar Facebook ac Instagram.

Sesiynau galw heibio cyhoeddus

Cynhelir cyfres o sesiynau gwybodaeth i’r cyhoedd sydd â diddordeb mewn gyrfa mewn gofal ar y dyddiadau ac yn y lleoliadau isod:

• 25 Tachwedd, Y Ganolfan Ddysgu, Hen Gwrt, Caernarfon 2.00-6.00pm
• 26 Tachwedd, Canolfan Byw’n Iach Glaslyn, Porthmadog 3.00-6.00pm
• 27 Tachwedd, Neuadd Dwyfor, Pwllheli 3.00-6.00pm
• 28 Tachwedd, Llyfrgell Bangor, Bangor 3.30-6.00pm
• 2 Rhagfyr, Llyfrgell Blaenau Ffestiniog, Blaenau Ffestiniog 3.00-6.00pm
• 9 Rhagfyr, Llyfrgell Dolgellau, Dolgellau 3.00-6.30pm
• 16 Rhagfyr, Llyfrgell Tywyn, Tywyn 3.00-6.00pm