Pwyllgor Cynllunio a'ch hawl i siarad

Mater i chwi yw beth y dymunech ei ddwyn i sylw pwyllgor ond o dan y Ddeddf Cynllunio mae’n rhaid i benderfyniadau ar geisiadau cynllunio fod yn unol â’r cynlluniau datblygu a chanllawiau cenedlaethol oni bai bod ystyriaethau cynllunio eraill yn cyfiawnhau penderfyniad sydd yn groes. Ni all y Cyngor wrthod caniatâd cynllunio dim ond am y rheswm bod gwrthwynebiadau wedi eu cyflwyno na chymeradwyo cais dim ond am fod nifer yn ei gefnogi neu fod dim gwrthwynebiad.

Rhaid i’r materion a godir gennych ymwneud ag ystyriaethau materol cynllunio e.e.

• Y polisïau yn y cynlluniau datblygu perthnasol a chanllawiau cynllunio cenedlaethol.

• Penderfyniadau apeliadau blaenorol.

• Effaith ar gymeriad, harddwch ac edrychiad ardal e.e. safle, graddfa, maint, uchder a dyluniad.

• Effaith ar fwynderau trigolion cyfagos e.e. oriau defnydd, gor-edrych, amharu’n ormodol, a sŵn traffig.

• Effaith ar ddiogelwch priffyrdd e.e. gwelededd gwael, diogelwch cerddwyr, parcio, dwysedd y defnydd.

Ychydig neu ddim sylw a ellir ei roi i faterion nad ydynt yn ystyriaeth faterol cynllunio ac yn faterion preifat e.e.

• Sefydlogrwydd tir, traeniad, rhagofalon tân, glanweithdra a lle mewnol (ymdrinnir â’r rhain yn bennaf dan ddeddfwriaeth ar wahân i Gynllunio e.e. Rheoliadau Adeiladu)
• Cymeriad personol yr ymgeisydd.
• Anghytundeb ynglŷn â pherchnogaeth y tir yr effeithir arno.
• Hawliau tramwy preifat a thraeniau a hawlfreintiau preifat a chyfamodau.
• Effaith y bwriad ar werth eiddo
• Cystadleuaeth fasnachol e.e. rhwng siopau, tai bwytai, modurdai a.y.b.
• Colli golygfeydd

Dim ond yr ymgeisydd, ei asiant neu’r rhai sydd eisoes wedi cyflwyno sylwadau ysgrifenedig o fewn y cyfnod ymgynghori 21 niwrnod a all wneud cais i annerch y pwyllgor. Dim ond un person sy’n cael siarad o blaid neu yn erbyn cais. Caniateir i wrthwynebydd ac ymgeisydd siarad unwaith ar gais cynllunio yn unig. Os yw mater yn cael ei ohirio, ac eich bod wedi siarad yn y Pwyllgor hynny, ni fydd hawl i chwi siarad y tro nesaf y bydd y cais ger bron y Pwyllgor.

• Mae’r drefn i’w dilyn ar gyfer cyflwyno cais yr un fath i bawb a ddymunai siarad mewn pwyllgor.
• Eich cyfrifoldeb chwi yw darganfod os yw’r cais penodol y dymunech siarad arno i’w gyfeirio i’r pwyllgor neu i’w ystyried dan hawliau dirprwyedig. Gallwch ddarganfod hyn drwy gysylltu â’r Uned Cynllunio.
• Ond un person all siarad, ac os oes nifer o bobl yn dymuno siarad mae’n rhaid iddynt benderfynu pwy o’u plith fydd y siaradwr, a rhoi gwybod i’r Gwasanaeth Cefnogol Cynllunio yn ysgrifenedig neu drwy e-bost.
• Un amod y cynllun hwn yw eich bod yn caniatáu i’r Cyngor roi eich manylion cyswllt i eraill (sydd o’r un farn) sy’n dymuno siarad er mwyn eich cynorthwyo i enwebu siaradwr. Pe na bai hyn yn arwain at gytundeb, yr unigolyn cyntaf i roi gwybod i’r Cyngor a gaiff ganiatâd i siarad.
• Rhoddir caniatâd i chwi siarad os yw’r cais ar agenda’r pwyllgor yn unig. Gallwch archwilio’r adroddiadau ar raglen y pwyllgor o leiaf 3 diwrnod gwaith cyn y cyfarfod unai yn y Swyddfa neu ar ‘Dilyn a Darganfod Ceisiadau Cynllunio’ ar safle we’r Cyngor.
• Ni fydd y Gwasanaeth Cynllunio yn derbyn cyfrifoldeb dros fethu â chysylltu â chwi trwy’r manylion cyswllt a gyflwynir gennych.
• Hysbysir yr ymgeisydd/asiant, os nad yw wedi rhoi cais i siarad yn y pwyllgor, os ceir rhybudd gan wrthwynebydd o ddymuniad i siarad, fel y gall ymarfer ei hawl i ymateb iddo yn y pwyllgor.

Oni bai bod Cadeirydd y pwyllgor yn nodi fel arall, gwrandewir ar y ceisiadau cynllunio yn unol â’r drefn y maent yn ymddangos ar y rhaglen a gyhoeddwyd ac ni ellir gohirio cais ar sail na allwch fod yn bresennol neu oherwydd nad ydych yn barod i siarad pan fydd y Cadeirydd yn cyflwyno cais.

Gallwch dderbyn gwybodaeth o’r swyddfa cynllunio ynglŷn â lleoliad y cais y dymunwch siarad amdano ar y rhaglen.

Anfon fideo/Anerchiad Ysgrifenedig:

• Bydd gofyn i chi gyflwyno fideo i’r Gwasanaeth Cynllunio erbyn 5pm ar y dydd Iau cyn y Pwyllgor.
• Rhag ofn y bydd problemau technegol gofynnir i chi ddarparu copi ysgrifenedig o’ch anerchiad i’r Gwasanaeth Cynllunio erbyn 5pm y dydd Iau cyn y Pwyllgor y bydd y cais yn cael ei glywed ynddo.
• Yn unol gyda’r drefn siarad arferol, noder na ddylai’r fideo o’ch cyflwyniad nac eich anerchiad ysgrifenedig fod yn fwy na 3 munud o hyd.
• Pwysleisir mai cyfrifoldeb yr unigolyn sydd gyda diddordeb i siarad fydd i holi a derbyn cadarnhad am pryd bydd cais penodol yn cael ei chyflwyno i’r Pwyllgor

Mynychu’r Pwyllgor o’r Siambr:

• Cyfeiriad: Siambr Dafydd Orwig, Swyddfeydd Cyngor Gwynedd, Caernarfon, LL55 1BN
• Bydd angen cofrestru i siarad erbyn 5yh ar y dydd Iau cyn y Pwyllgor gan ddatgan eich bod yn bwriadu mynychu’r Pwyllgor mewn person
• Mae’n rhaid i chwi fod yn bresennol yng nghyfarfod y Pwyllgor a chyflwyno eich hun i’r Cyfreithiwr erbyn 12.45 p.m. Fel arfer bydd y Pwyllgor yn dechrau am 1.00 p.m. Bydd y Cyfreithiwr yn egluro'r trefniant a’r eisteddle i chwi siarad y pryd hynny.
• Pan wahoddir chwi gan Gadeirydd y Pwyllgor, gallwch siarad unwaith ac am hyd at 3 munud a dylid pwysleisio'r pwysigrwydd o gadw’n gaeth at yr amser.
• Nid oes angen ail adrodd yr holl bwyntiau a wnaed mewn unrhyw lythyrau gan fod y pwyntiau wedi eu hanfon i’r aelodau cyn dyddiad y pwyllgor.
• Cynghorir chwi i ganolbwyntio ar y prif bwyntiau sy’n achosi pryder i chwi neu yr ydych yn gefnogol iddynt.
• Ni chaniateir dosbarthu unrhyw ddeunydd ysgrifenedig, lluniau neu ddefnyddio unrhyw offer cyflwyno.
• Ar ôl siarad mae’n rhaid gadael i’r pwyllgor drafod y mater ac ni ddylech ymuno yn y drafodaeth hon.
• Gall y Cadeirydd ofyn cwestiwn/cwestiynau os bydd angen eglurhad ar rai o’r pwyntiau a godwyd.

Fel arfer gwneir penderfyniad yn y cyfarfod ond weithiau fe ohirir tan gyfarfod dilynol er mwyn gwneud archwiliad o’r safle gan y Pwyllgor. Os cynhelir ymweliad safle ni chaniateir siarad cyhoeddus ar y safle.

Bydd yr Uned yn hysbysu’r ymgeisydd/asiant o’r penderfyniad ar ôl dyddiad y pwyllgor.